Mesûd Serfiraz

Rihê kitêban li asîmanê Kurdistanê digere. Hefta borî li Amedê Fûara Kitêban hebû, piştî xilasbûna wê vê carê li Mêrdînê fûareke nû ya kitêban dest pê kir. Fûara ku ev çend roj in didome, heta 6’ê meha pêşiya me dê bidome. Ser xêrê be. Di van çend rojên pêşî de vane çavdêriyên min.

• Fûar li ser riya Qoserê di nava avahiyeke danûstanê ya bi navê Mova Park de ye. Ev avantaj e lewre çûn û hatina vê derê pir e, lê 19’ê gulanê tevî ku betlaneya fermî jî bû girseyeke mezin nebû li fuarê, jixwe qada fûarê jî ew qas ne mezin e.

• Maweya fûarê pir dirêj e: ji 18’ê gulanê heta 6’ê pûşperê. Ev tiştekî baş e, lê ji bo weşanxaneyan kulfet e. Lewre eger teleb zêde çênebe mimkûn e ku hin weşanxane berî qedandinê vekişin. 

• Weşanxaneyên tirkî yên mezin, wekî Îletişim, Metis, YKY li fuarê nîn in, ev yek cazîbeya fûarê kêm dike. 

• Ji aliyê kurdî ve weşanxaneya Nûbihar, Lîs, J&J, Do, Sîtav, Weqfa Beşikçi û Belge xwedî stand bûn. Her wiha standa wan nebe jî kitêbên Evrensel, Avesta, Enstituya Kurdî ya Stenbolê li fûarê peyde dibin. 

• Di çarçoveya fûarê de nivîskar wê kitêbên xwe jî îmze dikin. Bo nimûne 23’yê gulanê Eyup Kiran, 24’ê wê Perwîz Cîhanî, 23-24’ê wê Recep Dildar û 30-31’ê wê Îsmail Beşikçi wê kitêbê xwe îmze bikin.

• Min digot qey Peyvend û kovara Kurt Tarihi jî li fuarê ne lê ji berpirsê standa Lîsê hîn bûm ku jê vekişiyane. Ew bi xwe jî gazindar bû ji organîzasyonê. 

• Vê fûarê şîrketeke taybet organîze dike, Şaredariya Bajarê Mezin a Mêrdînê jî piştgirî dide lê xuya ye problem hene.

• Di danasîna fûarê de dibêje ku qezenca vê fûarê wê ji bo avakirina Kobanî bê xerckirin, lê çawa? Bi qasî ku hîn bûm, weşanxaneyên beşdar wê ji firotina xwe sedî 30’î bidin şîrketa organîzator, ew jî hinek ji vî pereyî bişîne Kobanî. Fikreke baş e lê hewce ye saziyên kurdî, xisûsên Şaredariya Bajarê Mezin hişyar be, da ku ev pêk bê û neyê îstîsmarkirin.

• Bi rastî li Qoser, Nisêbîn, Midyad, Kerboran, Şemrex û Dêrikê potansiyeleke mezin a kurdî heye, her wiha li navendê li Zanîngeha Artukluyê hem beşa kurdî heye hem jî bi hezaran xwendekarên kurd. Lê jixwe berî vê bi çend rojan li Amedê fûar hebû, yên meraqdar ji wir kitêbên lazim kirîn, lewre şensê vê fûarê kêm e. Dîsa jî hêvî dikim ku têk neçe û rengê kurdî lê zêdetir bibe.

**

Nûçeya eleqedar:

- Mêrdîn jî bû xwedî fûareke pirtûkan