Zekî Ozmen

Nivîskar û mamosteyê zimanê kurdî Abdulkadir Ulumaskan du pirtûkên çîrokan yên nû ku ji bo zarokan hatine nivîsandin weşandin. Pirtûkên nû yên Ulumaskan yek jê "Çûkê Reş" e û ya din jî çîroka mîtolojîk "Şahmaran" e. Her du pirtûk jî her yek ji çîrokekî pêk tên. Her du pirtûk bi zimanekî ku zarok jê fêmbikin hatine nivîsandan û bi vê armancê puntoya nivîsê ya mezin jî hatiye bikaranîn. Nivîskar Abdulkadir Ulumaskan bi heman armancê çîroka Şahmaranê jî nivîstiye. Pirtûka bi heman navî, bi taybetî ji bo zarok û ciwanan hatiye nivîsandin û bi vê armancê jî hewl hatiye dayîn ku ziman sivik be. Nivîskarê pirtûkê di pêşgotinê de diyar dike ku navê "Şahmaran ji peyvên "Şahê" "Maran" ên kurdî pêk tê û heman nav bi vî awayî di nava zimanên din de jî bi cih bûye. Ew her wiha balê dikişîne ser wê yekê ku çîroka Şahmaran dişibe mîtolojiya Newrozê û bi weşandina pirtûkê ew dixwaze nifşê nû yê kurdan jî bi vî awayî vê çîroka navdar bibihîze. Redaksiyona her du pirtûkên zarokan yên Ulumaskan, nivîskar û mamosteyê zimên Fêrgîn Melîk Aykoç kirine û pirtûk ji hêla Weşanên Yekîtiya Mamosteyên Kurd li Almanyayê hatin weşandin.

Nivîskar Ulumaskan bi fermî mamosteyê kurdî ye

Nivîskar Abdulkadir Ulumaskan ev demeke dirêj e li dibistanên Almanyayê bi awayekî fermî  dersên kurdî dide şagirtan. Di ber karê mamostetiyê re ew pirtûkan jî dinivîse. Wî  heta niha gelek pirtûk weşandine û bi taybetî giraniya xwe daye nivîsandin û weşandina pirtûkên ji bo zarokan. Ji hêla din ve ferhenga almanî û kurdî ya ji hêla Ulumaskan ve salên borî bal kişandibû ser xwe.

Berhemên nivîskar Abdulkadir Ulumaskan yên heta niha hatine weşandin:

1. Destpêka Hînbûna Kurdî

2. Ferhenga kurdî-almanî

3. Wergera "Mesiyê Reş ê biçûk" a Samed Behrengî

4. Wergera "Xoxek Hezar Xoz" a Samed Behrengî

5. Çîroka Newrozê

6. Çîroka Hezar û Şevekê

7. Dersên Ola Îslamê

8. Kurdî, Pêngav 1 (ligel Mahmut Aydin)

9. Kurdî, Pêngav 1 Pirtûka Xebatê (ligel Mahmut Aydin)

10. Çûkê Reş

11. Şahmaran