Diyarname

Rojnameya Azadiya Welat, rojnameya Alternatîf, rojnameya Gelecek, kovara Yurtsever Gençlîk, kovara Ozgur Halk, kovara Hêviya Jinê, Ajansa Nûçeyan a Dîcleyê (DÎHA), Şîrketa Belavkariyê ya Firatê, Gun Radyo TV, Ses Radyo, Net Radyo, Dunya Radyo û Weşanxaneya Aramê zordariya li ser çapemeniya kurd bi daxuyaniyek nivîskî şermezar kir. Di daxuyaniyê de zordariyên li ser çapemeniya kurd bi tundî hatin şermezar kirin û wiha hate gotin:

"Li Tirkiyeyê de di serî de çapemeniya azad û çapemeniya muhalîf rastî zordariyên mezin tên. Dewleta tirk bi dozger, dadger, polîs, cendime, şirketên belavkariyê dixwaze çapemeniya kurd ji holê rake. Bêyî tu hiqûqan li ber çavan bigire êrîşî weşanên pirsgirêka kurd di rojevê de digirin, dike. Rojname, kovar, radyo tên girtin. Xebatkarên van saziyan tên cezakirin. Herî dawî girtina Rojnameya Alternatîk û Ozgur Halkê jî mînakên dawî ne. Dixwazin bi girtinê nehêlin weşan derkevin. Em îdîa dikin ku heman zordarî li rojnameya herî mezin a Tirkiyeyê bên kirin dê di nav hefteyekê de têk biçe. Lê ji ber piştgiriya gel bi salan e çapemeniya azad li hemberî zordariyan li ber xwedide."

'Zordarî bi destê Serfermandariya Giştî tên meşandin'

Di daxuyaniyê de tê derbirîn ku zordarî bi destê Serfermandariya Giştî tên meşandin û ev tişt hatin gotin: "Di planên wan ên deşîfre bûyîn de derkete holê ku herî zêde dixwazin çapemeniya kurd bêdeng bikin. Serfermandarê Giştî Başbug di civînên xwe de yên bi nûnerên Tv û rojnameyan de birîfîng da û got 'Nûçeyên PKK'ê nedin, nebêjin Apo, wêne û dîmenan nedin'. Yên wisa bi zirafî fikirîn elbette dê rojnameya Alternatîfê û kovara Ozgur Halkê bigirin. Ev girtin bi emrê Serfermandariya Giştî pêk hatine. Di pirsgirêka kurd de zordarî li gorî daxwaza leşkeriyê tên meşandin. Ji ber ku di rojevê de operasyon hene û tên zêdekirin. Li herêmê komkujiya sivîlan dom dike, îşkence zêde dibe û daxwazên kurdan bi şidetê tên paşvexistin. Yên vana tînin ziman tên bêdengkirin."

'Saziyên çapemeniyê yên Tirkiyeyê û cîhanê bêdeng in'

Di daxuyaniyê de hate destnîşan kirin ku saziyên çapemeniyê yên Tirkiyeyê û cîhanê li hemberî vê zordariyê bêdeng dimînin û ev xal hatin vegotin: "Ker û kor jî zordariyên li ser kurdan dibînin. Lê mixabin saziyên çapemeniyê yên cîhan û Tirkiyeyê li hemberî vê yekê bêdeng in. Li gorî xwe çapemeniya kurd wekî çapemenî nabînin. Ligel vê rûreşiyê radibin ên têkoşîna azadiya gelê kurd û yên vê têkoşînê didin, wekî cudakar îlan dikin. Cudakariya mezin jî wekî dikin nedîtina zordariyên li ser çapemeniya azad in. Yên li hemberî gotinên Serokwezîr R. Tayyîp Erdogan, feryad fîgan dikin li hemberî zordariyên li ser çapemeniya kurd bêdeng dimînin. Ev yek jî bêexlaqiya wan a çapemeniyê nîşna dide. Ji xwe wan di nav şerê qirêj ê li hemberî gelê kurd de li cem Serfermandariya Giştî cihê xwe girtin. Îro jî feryada gelê kurd a ji bo zimanê zikmakî nabîne."

Her wiha di daxuyaniyê de hate derbirîn ku heta çapemeniya kurd li Tirkiyeyê azad nebe kes nikare behsa azadiya çapemeniyê bike û wiha hate gotin: "Bi girtin, binçavkirin, revandin, kuştin û qedexekirinê herî zêde zordarî li ser çapemeniya kurd tê meşandin. Bi emrê Serfermandariya Giştî ev zordarî teva tên meşandin. Lê li hemberî vê yekê ne saziyên çapemniyê yên Tirkiyeyê û ne jî yên cîhanê nabînin. Ku li deverek din a cîhanê na jî li Tirkiyeyê ev zordarî le ser weşanek din bihata meşandin dê qiyamet rakiribana. Ji xwe tune hesibandina kurdan encamek ji ya bêdeniya cîhanê ye jî. Ev zordariya Tirkiyeyê ya mezin hêza xwe ji bêdengiya saziyên navneteweyî yên cîhanê jî digire." Di daxuyaniyê de ji bo piştgiriyê bang li hemû hunermend, rewşenbîr, karker, esnaf, xwendekar, jin û hemwelatiyên bi hîstiyar û demokrat hate kirin ku bêdeng nebin. Her wiha serdagirtina Buroya Azadiya Welat a Mêrsînê jî bi tundî hate şermezarkirin.