ERDOGAN ALTAN – WAN

Daxwaza gelê kurd a ji bo zimanê zikmakî hindî diçe gur dibe. Ligel kampanyaya `Êdî bes e ez perwerdehiya bi zimanê zikmakî dixwazim` eleqeya kurdan a di warê ziman de xurtir bû. Têkildarî kampanyayê şaredariyên DTP`î yên herêma Serhedê jî anîn ziman ku piştgiriyê didin kampanyayê û dê di pêşerojê de di warê xebatên fermî yên şaredariyê de jî gavan bavêjin. Şaredaran diyar kir ku dê anons û xebatên din ên şaredariyê bi kurdî ji gel re vebêjin.
Kampanya `Êdî bes e ez perwerdehiya zimanê zikmakî dixwazim` ku ji hêla TZPKurdî ve hatiye destpêkirin, bi berfirehî berdewam dike. Di çarçoveya kampanyayê de şaredariyên DTP`î yên li herêmê jî dest bi pêkanîneke nû dikin. Şaredariyên piştgirî dan kampanyayê anîn ziman ku piştî kêmasiyên teknîkî qedandin dê xebatên xwe bi kurdî ji gel re vebêjin û nivîsên fermî bi kurdî biweşînin. Têkildarî mijarê şaredaran anî ziman ku piraniya gelê herêmê bi kurdî diaxive û bal kişandin ser hewceyiya kurdî. Şaredaran anî ziman ku mînaka Meclîsa Şaredariya Sûra Amedê û Şaredar Abdullah Demîrbaş ku ji ber biryara pirzimaniyê ji peywirê hatine girtin ji bo wan mînak e.

ŞAREDARIYA SÛRÊ...
Şaredarê navçeya Gevera Colemêrgê Salîh Yildiz, der barê mijarê de agahî dan û diyar kir ku her çiqas di zagona şaredariyê de di hêla meşandina xebatên nivîskî yên fermî de yekzimanî hebe jî ew dê di rojên pêş de, xebatên bi kurdî bidin destpêkirin. Yildiz, da zanîn ku ji ber li Geverê ji sedî 95`î zêdetir kurd in û bi kurdî diaxivin, ew jî bi gel re bi kurdî diaxivin. Yildiz, wiha got: “Di dilê me de tiştekî wiha heye lê ji ber di hêla teknîkî û kadroyan de kêmasî hene, em heta demekê dest pê nakin. Lê em ê van kêmasiyan temam bikin û dest bi xebatê bikin. Em ê xebatên Şaredarê Sûrê ya berê Abdullah Demîrbaş ji xwe re wekî mînak bigirin. Di pêşerojê de mimkûn e ku em dest pê bikin.”

JI ANONSAN DEST PÊ DIKE
Şaredara bajaroka Sixkê ya Wanê Gulcîhan Şîmşek jî diyar kir ku ew jî mexdûreke asîmîlasyonê ye û ji ber vê yekê kêmasiyeke mezin dijî. Şîmşek, destnîşan kir ku niha ew bi xwe fêrî kurdî bûye û di nava gel de bi kurdî diaxive û heke ew îmkan hebe dê xebatên xwe fermî bikin. Şîmşek, anî ziman ku piraniya kesên di nav sînorê şaredariya wan de dijîn kurd in û bi zorê hatine koçberkirin. Şîmşek, derbirî ku ji ber vê yekî jî ew ê xebatên xwe yên fermî yên wekî anons û agahdariyên din bi kurdî bikin. Şîmşek wiha axivî: “Lê belê heke di hêla nivîsandin û vegotina xebatên fermî yên şaredariyê de destûr neyê dayîn jî, em ê anonsên ku ji şaredariyê dikin bi kurdî yanî bi zimanê gel bikin. Ji bo ku gel fêm bike. Qet nebe jî em ê anonsan bi kurdî bikin.”

‘ÇI LAZIM BE EM Ê BIKIN’
Şaredarê navçeya Şemzînanê Hurşît Tekîn jî destnîşan kir ku ew ê ji bo ku bibînin ka di vê mijarê de ew dikarin çi bikin, bi xebatkarên şaredariya xwe re nîqaşan bikin û li gorî wê ew ê dest bi xebateke wiha bikin. Tekîn jî anî ziman ku pirsgirêkên wan ên di hêla mijarê de hene, heke temam bikin ew ê anonsên şaredariyê û nivîsên fermî bi kurdî bikin.
Şaredarê navçeya Qopê ya Mûşê Nasir Aras jî anî ziman ku di pêşerojê de dê xebatên xwe bi kurdî bimeşînin. Aras, diyar kir ku têkildarî vê mijarê çi ji destê wan bê ew ê bikin.

LI BAZÎDÊ ANONSA BI KURDÎ
Şaredara navçeya Bazîda Agiriyê Mukaddes Kubîlay jî diyar kir ku ew di nava gel de ye û têkiliyên xwe hemû bi zimanê kurdî dike. Kubîlay got ku ew kêmasiyên teknîkî der barê mijarê de xilas bikin dê dest bi xebateke wiha bikin û ev tişt gotin: “Ji xwe em di nava gel de ne, têkiliyên me yên bi gel re bi kurdî ne. Hemû xebatkarên şaredariyê jî bi gel re bi zimanê wan diaxivin û têkiliyê datînin. Ji niha ve hin anonsên me ku ji şaredariyê tên kirin bi kurdî ne, ji ber ku li navçeyê gelek rexne ji me re anîn ku ew bi tirkî zêde fêm nakin ji anonsan. Li ser vê yekê em jî hin anonsên xwe bi kurdî dikin.”

BIRYARA KONFERANSÊ BÛ
Di Konferansa Rêvebereyên Heremî ya 2005’an de ji bo ku xebatên pirzimanî yên şaredariyên di destê siyaseta kurd de bi kurdî bên kirin biryara prensîbê hatibû girtin.

Nûçeya DÎHA ji Azadiya Welat hatiye girtin