NAVENDA NÛÇEYAN

Ji bo girtiyê siyasî yê Kurd Saman Nesîm ê rejîma Îranê biryara darvekirinê derheqê wî de daye, Neteweyên Yekbûyî (NY) bang li Tehranê kir. Rayedarên NY’î destnîşan kirin ku darvekirina girtiyên ne reşît, bi ti awayî nayê qebûlkirin.

Girtiyê siyasî yê Kurd Saman Nesîm ê di encama darizandina ne adîl û lêpirsîna di bin îşkenceyê de bi cezayê darvekirinê hat mehkûmkirin, ji ber sûcên ku tê îdîakirin di 17 saliya xwe de kiriye, dibe ku îro bê darvekirin.

Malbata Nesîm çend roj berê dabû xuyakirin ku ji wan re hatiye gotin, dibe ku Nesîm 19'ê Sibatê bê darvekirin. Kurdistanî û dostên wan ji bo Nesîm neyê darvekirin, li gelek welatên cîhanê xwepêşandan lidar xistin. Rayedarên Neteweyên Yekbûyî (NY) jî banga "Darvekirinê rawestîne” li rêveberiya Tehranê kir.

Raportorê Taybet ê Kuştinên Kêfî yan jî Darizandin, Derveyî Hiqûqê yê Neteweyên Yekbûyî Christof Heyns û Raportorê Mafên Mirovan ên li Îranê yê NY’î Ahmed Shaheed li bajarê Swîsre Cenevreyê civîneke çapemeniyê lidar xistin. Di civînê de bal kişandin ser rewşa Nesîm û diyar kirin ku girtiyên ne reşît bi ti awayî nikarin bên darvekirin.

Rayedarên NY’î dan xuyakirin ku sala 2014'an li Îranê zêdeyî 700 girtî bi cezayê darvekirinê hatine cezakirin, ji van 14 jê jin, 13 jê ciwan in û bibîr xistin ku di Çileya borî de 60 kes hatine îdamkirin.

Bê hiquqî di darezandina Saman de hat kirin

Saman Nesîm Nîsana sala 2013'an li bajarê Mahabad ê Rojhilatê Kurdistanê, ji aliyê dadgeheke ceza ve ji ber endametiya Partiya Jiyana Azad a Kurdistanê (PJAK) bi îdîaya dijminatiya Xweda (moharebeh), li cîhanê bê exlaqî (ifsad fil-arz) û çalakiya çekdarî ya li hemberî Mûxafizên Şoreşa Îranê sûcdar hat dîtin û cezayê darvekirinê lê hat birîn.

Nesîm dema hat girtin 17 salî bû, destûr jê re nehat dayîn ku bi parêzer re hevdîtinê bike. Nesîm got ku neynûkên wî yên pê û destan hatine kişadin, li wî hatiye xistin, li pişt, ling û zikê wî birîn hene, demeke dirêj bi awayekî serberjêrî hatiye daliqandin û îşkence lê hatiye kirin.

Rêxistina Efûyê ya Navneteweyî ku çend roj berê nameya Nesîm weşand û di nameyê de wiha tê gotin: "Rayedarên Îranî nehiştin parêzerên Saman Nesîm dozê bişopînin û nehiştin parêzerek ji bo wî bê erkdarkirin." Hatibû ragihandin ku di 15'ê Sibatê de kesên ji rayedarên îstîxbaratê, ji bo Nesîm sûcên lê tên kirin qebûl bike, bi saetan li wî dabûn.

Berpirsyarê Mafên Mirovan a Wezareta Karên Derve ya Almanyayê Christoph Strasser duh daxuyaniyeke nivîskî weşandibû û gumana xwe ya ji ber xeteriya darvekirinê ya li ser Saman Nesîm anîbû ziman. Strasser dabû diyar kirin ku dema Nesîm hat sûcdarkirin, reşît nebû û gotibû: "Pêwîste rayedarên Îranî înfazê rawestînin û ji bo Nesîm pêvajoyeke adîl a darizandinê bidin destpêkirin."

Rojnews