Mêrdîn
Xelatên Pêşbaziya Rojnamegeriyê ya Mûsa Anter û Şehîdên Çapemeniya Azad îşev li Nisêbînê bi merasimekê hatin belavkirin.
Ji bo bîranîna rewşenbîrê kurd Musa Anter îsal xelatên Pêşbaziya Rojnamegeriyê ya Mûsa Anter û Şehîdên Çapemeniya Azad li warê Anter li Nisêbînê hatin belavkirin. Merasima ku ji aliyê rojnameya Azadiya Welat û Şaredariya Nisêbînê ve li Navenda Çanda Mîtanî li dar ket. Hevseroka DTP'ê Emine Ayna, mebûsên DTP'ê yên Amedê Gultan Kişanak, Aysel Tugluk, mebûsê berê yê DEP'ê Selim Sadak, Şaredara Baglara Amedê Yurdusev Ozsokmenler, hevalê Anter û nivîskar Canip Yildirim, Şaredarên Nisêbîn, Qoser, Misoriyê, Kerboran, Dilbisiyê, nûnerên Egitim Sena Qoser û Nisêbînê, reveberên Belediye İşa Mêrdînê, Serokê ÎHD'ya Mêrdînê Erdal Kuzu, Serokê Enstîtuya Kurdî ya Stenbolê ami Tan, gelek rêveberên DTP'ê û gel beşdarî merasimê bû.
Di merasimê de pêşî lîstika "Araf" ku Cihan Şan nivîsandiye û Aydin Orak lîstiye hate pêşkêş kirin. Lîstika ku ji aliyê Teatra Jiyan ve hatiye amadekirin li ser jiyana Apê Mûsa hatiye rêstin.
Piştî lîstik û sînevîzyonê axaftin hatin kirin û xelat hatin dayîn.
Di şevê de Gerînendeyê Weşanê yê Azadiya Welat Tayîp Temel sipasiyên xwe pêşkêşî Şaredariya Nisêbînê kir, diyar kir ku ew têkoşîna Apê Mûsa didomînin û wiha got: "Kevneşopiya Çapemeniya Azad didome. Em jî li vê derê soz didin ku wekî gelê kurd û rojnamegerên kurd heta dilopeke xwîna me bimîne emê têkoşîna xwe bidomînin. Digel hemû zehmetiyan emê di vê rêyê de meşa xwe bidomînin."
Temel piştî axaftina xwe plaketa sipasiyê da Şaredarê Nisêbînê Mehmet Tanhan. Tanhan jî qala bîranînên xwe û yên Musa Anter kir û da zanîn ku ew gelek kêfxweş in li Nisêbînê merasimeke bi vî rengî li dar dixin.
Piştî axaftinan xelat hatin belavkirin. Di beşa pêşbaziyê ya kurdî de xelata yekemînî nûçegîhanê DÎHA'yê M. Ali Ertaş bi dest xistibû û Ertaş xelata xwe ji destê Serokê Enstîtuya Kurdî ya Stenbolê Sami Tan girt. Xelata Taybet a Juriyê Cemil Oguz û Erdogan Altan girt. Şaredara Baglarê Yurdusev Ozsokmenler xelata Oguz li ser navê wî da Ertuş Bozkurt. Erdogan Altan jî xelata xwe ji destê endamê juriyê Murat Çelikkan girt.
Di beşa nûçeyên tirkî de jî nûçegîhanê DÎHA'yê Firat Çagin û Uygar Gultekîn û nûçegîhana Evrenselê Ceren Saran xelatên xwe ji destê Hevseroka DTP'ê Emine Ayna girti.
Di warê nûçegihaniyê de Welî Ay, Şerî Karataş û Nesrîn Yazar, di beşa karîkaturê de Murat Îpek û Ahmet Bilge, di beşa wêne de Weysî Altay xelatên xwe ji destê mebûsên DTP'ê Aysel Tugluk, Îbrahim Binici, nivîskar Canip Yildirim, karîkaturîst Halil Încesu, endama Lijneya Weyanê ya rojnameya Alternatifê Yüksel Genç û Şaredara Qoserê Cihan Sincar girtin.
Xeyata taybet a Gurbeteli Ersoz jî ji bo xebatên wan li ser jinan da kovar "Hêviya Jinê". Li ser navê kovarê Xecê Sevgin xelat girt.
Piştî belavkirina xelatan Ayfer Duzdaş li bexçeya Navenda Çanda Mîtanî konsereke dan û şev bi dawî bû.
***
Nûçeyên têkildar:
- Encamên xelatên Apê Mûsa eşkere bûn
- Apê Musa li cihê hat qetilkirin hat bîranîn