Şengul Ogur

Dibêjin…Dê kurd bi mîlyonan dakevin qadan, doza zimanê xwe bikin.
Dê çalakiyan pêk bînin.
Dê diruşmeyan biqêrînin.
Dê zarok, xort, keç, dê û bav bi hev re, mil bi mil strana kurdiyê bilorînin.
Dê ji pişaftin û xwepişaftinê re bibêjin, Êdî Bes e!
Rast?! Ma ew roj hat gelo?!
Bi rastî jî emê bibêjin, Êdî Bes e?!
Emê "êdî" bi zimanê xwe biaxivin, emê bixwînin û emê binivîsinin bi zimanê xwe?!
Ev daxwaz dê li meydanan nemîne ne?!
Dê li kuçeyan nemînê ne?!
Dê li ser nivîsên afîş û dîwaran nemîne na?!

Ez dixwazim..! "na"yekê bibihîzim -wilo nehîte -ji dengê koraya deh hezarên serxweşê zimanê xwe!
Dixwazim..! "na"yekê bibihizîm û bimrim îşev!
Lê...dile min dike gulpe gulp, hêstirêk ji lûleya xwe pekiyayî
Xwe li kevîka çavê min  dide, diteqe
Û min dikuje…dikuje ev tirs!
 
Lê ku li wir sêwî bimînê rojnameyek, kovarak, pirtûkek?!
Lê ku gotin, "ne guzel bi eylemdî" (çi çalakiyeke baş bû) çalakvanan?!
Aha wî çaxî, ezê bimirim
Ku di berbeyaniyê de nebihisim, roj baş
Ku  xweştiviyê ne bihîst, ji te hez dikim delalam

Darbesta min li milê we ye ey gelê min
Û darbesta we li milê min ê mirî
Emê bimeşin ber bi tariya zemanan
Li termê hev bigerin kor kor
Emê li dengê hev bigerin kerr kerr

Roja mehşerê
Ji yezdanê dilovan bexşînê hêvî bikin
Lê Yezdan dê wiha kerem bike:
"min da we zimanê zemanan
We, belê we, jehr kir zimanê zeman
Û hûn! hatin lanet kirin
Qewirîn ji bihuşt û rehma yêzdan
Heta hetayê hûnê di zemên de li xwe bigerin
Bi kerrî û lalî’’

Em...Em ên  tawanbar
Serê me diber me de
Her bifikirin
Her bifikirin
Bifikirin..!

gernus@msn.com