Şengul Ogur
 
Ku mirov bala xwe bide ancamnameya konfaransa duyemîn a TZP ku di 27-28'ê gelawêjê de pêk hat, mirov dibîne ku çareseriya pirsgirêka kurdî di dewletê  de hatiye dîtin. Lewra mirov li xalên ku ji raya giştî re hatine eşkere kirin binêre, di her şeş xalên pêşîn de ev îbare derbas dibe: "Lewra delegasyona konferansê bang li dewletê kir..."
Di xala heftan de behsa mîtîngekê ku li Batmanê dê bê kirin dike.
Xala heştan de behsa piştgirî dayîna li vê mîtînga ku dê bê kirin dike.
Xala nehan de jî bang li hikumeta herêma başûr tê kirin ku zaravayên din jî bikin fermî.
Em baş dizanin ku her şeş xalên pêşîn ku tê de bang li dewletê hatiye kirin dê çareseriyekê ji zimanê kurdî neyne. Ji bo vê jî em tu hêviyên xwe bi van xalan ve girê nedin û li ser xalên heft û heştan bisekinin. Gelo xalên heft û heştan dê çareseriyekê bînin an na?
Ku mirov bala xwe baş bide xala heft û heştan, yanî biryara li darxistina mîtînga ku li Batmanê dê bê lidarxistin û piştgirîdayina sazî û civaka kurd mirov dibîne ku ev jî,"bang li dewletê kirin e". Di qadan de, bi devê deh hezaran bang li dewletê kirine ji bo çareseriya pirsgirêka zimanê kurdî. Û ev jî biya min dê çareseriyê pêk neyne. Lewma;
Yek, ji dewletan ziman nayê xwestin.
Didu, dê dewlet dê guh nedê vî dengî.
A sisiyan jî ziman li qadan nayê xwestin. Û bi sloganan jî nayê bidestxistin.
Ziman li pirtûkxaneyan tê xwestin û axaftin, xwendin û nivîsandinê tê bidestxistin. Ziman ne ew tişt e ku mirov bê li qadekê li hev kom bibe û piştî diruşmeyên, "Êdî bes e em zimanê xwe dixwazin" bilindkirinê dest bi axaftina zimanê din kirin e û zimanê xwe di nav toz û ecacoka mîtîngê de hiştine.
Di 10.06.2008'an de li Geverê mîtînga, "Edî bes e, em zimanê xwe dixwazin" hate lidarxistin. Gelo wê rojê, li Geverê çend rojnameyên kurdî hatin kirîn, çend kovar û pirtûkên bi zimanê kurdî hatin kirîn.
Ji wê rojê hetanî vê roja li Geverê di firotina rojnamema, kovar û pirtûkên kurdî de guherînek ber bi çav a ber bi başbûnê ve çêbû ye?
Ger çênebûbe li şûna di mîtîngan de ziman xwestinê û vê xwestinê ji dewletê kirinê em bi hezaran bi mîlyonan kovar û pirtûkan bê perê bidin vî gelê ku dibêje em zimanê xwe dixwazin ne baştir e?
Ger ku hûn bibêjin, "tu ji ciyê têr diaxive!" ma bi rastî jî sazî û dezgehên me yên ku bi sedhezaran kovar û pirtûkên bi kurdî bikirin û bê pere li gel belav bikin tune ne?
Ma şaredariyên me nikarin bikevin pişt vî barî ?
Ma qedexe ye ev kirin?
Ger ku em xwedî li xwe dernekevin, ger em bang li xwe nekin, ger ku em banga hev nebihîzin ma ew dê çawa bibihîzin û çareseriyekê bibînin?
Wekî encam: Dive em pişta xwe bi xwe bixurînin.

***

Nivîsa li ser encamnameya TZPKurdî: TZPKurdî ji bo ziman li Batmanê mîtîngê li dar dixe