Diyarname
Karakterên navdar û şêrîn ên Belçîkayê ku li Tirkiyeyê wekî "Şîrînler" (Malbata Şêrînan) tê nasîn ketin 50 saliya xwe. 2008 di heman demê de 80'emîn rojbûna xêzkarê wan 'Peyo' (Pierre Culliford) e ku Peyo di sala 1992'yan de jiyana xwe ji dest dabû.
Navê wan ê bi fransizî 'Les Schtroumfs' e, bi îngilîzî jî Smurf e. Li gor kovara fransî 105 'Şîrîn' hene. Peyoyê belçîkî ew xêz kirine û yekem car di 1958'an de wekî xêzeroman di kovareke kok belçîkî bi navê "Spirou" de hat weşandin, di sala 1981'ê de jî di televîzyonê de hat weşandin. Xêzefilmê "Şîrînan" ji 256 beşan pêk tê. Îsal ji bo 50'emîn sala şîrînan dê gelek çalakî pêk bên.
Şîrînên ku gelek hezkiriyên wan hene, demeke dirêj ew wekî komunîst hatin bi nav kirin, lê teqez nehatiye diyarkirin ku rastiya vê çi ye.
Bi mîlyonan heyranê şîrînan derketin holê di vê serdemê de lê bi vê tenê ew di rojekê de neman, tiştên din jî hebûn. Di dema Şerê Sar de îstîxbarata DYA'yê FBI ket dû şêrînan ji ber ku "şêrînan propagandaya komunîzmê" dikir: Li gundê şêrînan jiyana komunal hebû, pere nedihat bikaranîn, hilberîn wekhev dihat parvekirin, rengê hêşîn ê şêrînan wekî kincên karkeran bû, bi ser de jî "Bav Şêrîn" bi rûyê xwe yê dirêj û bi kuma xwe ya sor dişibiya Karl Marks... Her wiha tê gotin ku FBI xwestiye di dema Şerê Sar de di televîzyonên DYA'yê (Dewletên Yekbûyî yên Amerîkayê) de şîrînan qedexe bike.
Û çend xalên ji 'jiyana komunîst' a şîrinan:
- Li gund jiyaneke bi hev re serdest e. Li gund pere nayê bikaranîn lê her kes tiştê pêdiviya wî/ê pê heye bê pere digire.
- 'Şîrînê Tiral' jî digel ku kareki nake di standarda şîrînên din de dijî. Ev jî "marê tiraliyê" nîşan dide.
- Li gundê şîrînan îbadetxane nîn e.
- Neyarê şîrînan "Gargamel" kincê keşeyan li xwe dike û olê sembolîze dike. Gargamel wekî kapîtalîzmê hezkiriyê pere û zêran e û her dixwaze şîrînan bixwe. Ev daxwaza wî jî mîsyonerî nîşan dide.
- Erdê şîrînan ne tenê aîdê yekî ye aîdê hemû şîrînan e û hemû şîrîn di vî erdî de dixebitin.
- Îngilîziya şîrînan "Smurf" (Small Men Under Red Flag) yanê "Mirovê biçûk ên di bin ala sor de dijîn" yan jî kurteya 'Socialist Men Under Red Father' yanê "Mirovên sosyalîst ên di bin bavê sor de" ye.