Cizîr
2'yemîn Rojên Çand û Hunerê ya Cizîrê bi dawî bû. Şaredarê berê yê Cizîrê got: Emê gora Mîr Bedirxan bînin Cizîrê.
Çalakiyên 2'yemîn Rojên Çand û Hunerê ya Cizîrê ku bi diruşma 'Rûmeta Ziman Zimanê Rûmetê' li Cizîra Şirnexê hatin lidarxistin, bi konsera ji bo bîranîna parlementerê berê yê DEP'ê Orhan Dogan û Yahya Menekşe bi beşdariya Koma Rewşen, Aynur Dogan û Xêro Abbas bi dawî bû.
Şaredarê berê yê Cizîrê Aydin Budak, Cîgirê Şaredar Ahmet Dalmiş, Sînemxan Bedirxan, Şaredarê Şirnexê Ahmet Ertak, Serokê DTP'a Şirnexê Halîl Îrmez jî di nav de bi deh hezaran kesan ve hate temaşekirin. Girseyê sloganên "Ciwan cangoriyên Apo ne", “Birêz Ocalan” “Bijî Serok Apo” avêtin.
Berî konserê, sînevîzyonek ku li ser xebatên Cizîrê hatiye amadekirin, hate pêşkêşkirin. Piştre Koma Rewşen û Aynur Dogan derketin ser dikê.
Aydin Budak ku di konserê de axaftinek kir, diyar kir ku di organîzasyonên bi vî rengî ku şaredarî lidar dixin de, rista gel heye û wiha dom kir: "We ev derfet da me. Ger ku we şaredarî nestenda, dibe ku ev derfet nebûya."
Budak, da zanîn ku beşdariya Sînemxan Bedirxan a li çalakiyên îsal girîng û watedar e û wiha dom kir: "Ev 150 sal in ku Bedirxanî li sirgûniyê ne. Sirgûnî, ji bo vê miletê ye. Em ê hewl bidin ku gora Mîr Bedîrxan ji Şamê bînin Cizîrê. Ji bo vê yekê çi ji destê me bê, em ê bikin."
Budak, diyar kir ku dewlet siyaseta xwe ya tunekirin û tunehesibandinê didomîne û wiha berdewam kir: "Nahêlin ku em navên bi kurdî li parqên xwe bikin. Lê navê Mustafa Muglali ku qatilê 33 kesan e, li Qerqeliyê didin qişleyek. Ev wehşetek e. Rûmeta herî mezin, ziman e. Zimanê me, bi saya dayikên me, jinên me, gundiyên me, koçerên me, dikandarên me hate vê rojê. Em ê vê rûmeta xwe ji niha û pê de jî bi hêzek mezin bibin pêşerojê. Em ê xwedî li zimanê xwe derkevin."
Konser, bi stranên Xêro Abbas bi dawî bû. Bi hezaran kesî heta derengiya şevê bi Abbas re stranên wî gotin.
Ji DÎHA'yê hatiye girtin