Diyarname
2'yemîn Rojên Çandê ya Cizîrê ku bi diruşma "Rûmetê ziman, zimanê rûmetê" li dar dikeve, bi meşa tevî lêdana erbaneyan dest pê kir.

Meşa ji bo destpêka Rojên Çandê ya Cizîrê de gelek kes amade bûn. Keça Celadet Elî Bedirxan Sînem Bedirxan, mebûsê DTP'ê yê Şirnexê Hasip Kaplan, mebûsê berê yê DEP'ê Selim Sadak, Cîgirê Şaredarê Cizîrê Ahmet Dalmiş, Serokê DTP'a Şirnexê Halil Îrmez, Endamê MP'ya DTP'ê Fadil Bedirhanoglu, Şaredarê Cizîrê yê ji peywir hat girtin Aydin Budak, nivîskar û rêveberên navçeya DTP'ya Cizîrê jî di nav de gelek kes tevî erbaneciyan meşiya û bi vî awayî rojên çandê dest pêkir.

Meş heta Parka Şaredariyê dom kir û li wir pêşangeh hate vekirin. Di vekirina pêşangehê de mebûsê berê yê DEP'ê Selîm Sadak axivî, got hatina Sînemxan Bedirxan rûmeteke û wiha dom kir: "Bila gora Mîr Celadet Bedirxan jî bînin Cizîrê. Gora Mîr Bedirxan li Şamê ye, ji Şaredariya Cizîrê daxwaza min ew e ku bila ji bo wî abîdeyeke li Cizîrê çêbike."
Her wiha Sadak li ser kurdî jî axivî û da zanîn ku kes nikare zimanê kurdî têk bibe.
Dûre Sînemxan Bedirxan axivî û got: "Ez nizanim çi bibêjim. Xwezî ew jî li cem me bana."
Mebûsê DTP'ê Kaplan jî got ku çalakî rastî rojbûna Kamûran Bedirxan hatiye û got: "Îro 103'yemîn rojbûna Kamûran Bedirxan e û gelek bi wate ye."

Piştî axaftinan pêşangeha ku Razaman Îmrag amade kiriye bi navê "Ji her alî ve Cizîr" û hemû hejmarên Hawarê wekî pêşangeh hate vekirin.
Pêşangeha Navenda Çanda Ciwanên Demokratîk jî bi navê "Reng diherikin nava axê" vebû.
Di dawiya bernameyê de Koma Dansa Gel a Kulîlkên Botanê hunera xwe pêşkêş kir.

Foto ji DÎHA'yê hatiye girtin