AMED
Ji bo erdheja bi mezinahiya 7.2 li Wanê û navçeyên wê qewimî û bi taybetî li navçeya Erdîşê rê li ber wendahiyên giran vekir; Şaredariya Bajarê Mezin a Amedê seferberî îlan kir. Amed ji bo alîkariya Kurdistaniyên li Wanê li ber karesata erdhejê ketin, seferberiya tewaw û berfireh da destpêkirin.
Şaredarê Bajarê Mezin ê Amedê Osman Baydemîr, Hevseroka BDP’ê Gultan Kişanak, Şaredarê Sûr a Amedê Abdûllah Demîrbaş hatin Şaredariya Bajaroka Eganîsê ya bi ser navçeya Erdîşê. Şaredar û rêveberê BDP’ê li vir ji aliyê Şaredar Velî Keser, Parlamenterên BDP’ê yên Wanê Ozdal Uçer, Nazmî Gur; Parlamenterê Agiriyê Halîl Aksoy, Şaredarê Sêrtê Selîm Sadak ve hatin pêşwazîkirin. Şaredar Keser der heqê erdhejê de BDP’yî agahdar kir û piştî nirxandina parlamenter û şaredaran, Şaredariya Eganîsê weke navenda koordînasyon û lojîstîkê hilbijartin.
Piştre Baydemîr, Kişanak û parlamenter derbasî navçeya Erdîşê bûn û li vir bi hemwelatiyan re rûniştin û ew guhdarî kirin. Ekîba teknîk û lêgerîn-xilaskirinê di bin serpereştiya Serokê Dayireya Agirkujê Hakki Bîlîcî de li xirabeyan dest bi xebat û lêgerînê kirin. Ekîba ku navborî li ser Kolana Zîlanê ji Avahiya/Bînaya Aydinê cesedê jinek derxistin; piştre li Avahiya Çeber a li ser Kolana Fatîhê dest bi xebatên lêgerînê kirin. Ekîb di nava demekê kurt de li vir rastî şopa însanên hê di bin xirabeyan de sax mane hat, ekîb xebatên lêgerînê bi nazikî domand.
LI SALONA ÎNTERNETÊ QIYAMET E
Hat zanîn ku Eyup Yilmaz ê 14 salî, kurê apê wî Omer Yilmaz ê 17 salî, Harûn Kaya yê 17 salî, zarokê bi navê Ozan ku paşnava wî nehat zanîn, li qatê herî binî li Salona 65 Înternet Cafe mehsûr mane. Zarokên qata yekem ku 5 qat di ser wan de hatine xwarê, alîkarî dixwestin; ekîba Bîlîcî serperiştî dikir, bêyî ku bêhna xwe vebidin heta sibê/spêdê xebitîn. Ekîba navborî stûnên sê qatan hûr kirin û xwe gihandin Harûn Kaya. Ekîbên tenduristiyê destpêkê oksîjen dan Kaya û piştre serom danê.
Li aliyê din ekîba lêgerîn û xilaskirinê ya ji Azarbaycanê hat, tevlî xebatên Şaredariya Mezin a Amedê bûn. Xebatên ta sibê berdewam kirin li vir negihiştin encamê, danê sibê di demjimêr 09:00’an de Harûn Kaya jiyana xwe ji dest da. Xebatkarên ekîban ji bo xwe bigihînin zarokên din, xebatên xwe domandin.
Di vê navberê de Baydemîr, Kişanak û yên pê wan re hatin ser xerabeyê, bi malbatan re hevdîtin pêk anîn û hewl dan ji wan re bibe piştgir û destek.
JI 3 HEZAR KESAN RE 3 DANAN XWARINA GERM
Baydemîr û Kişanak biryara ku li Parka Zîlanê Kon-aşxaneya berfirehî bê vekirin dan. Di berbanga sibê de di demjimêr 05:00’an de Şaredariya Mezin a Amedê xwarin da xebatkarên lêgerîn û xilaskirinê û malbatên ku li ser xerabeya dipêyan. Kon-aşxaneya 150 metirçargoşeyî dê roja sê dana xwarina germ bide 3 hezaran kesan. Berpirsyariya kon jî hevjîna Şaredarê Yenîşehîr a Amedê Firat Anli yê 3 sal e li girtîgehê tê girtin, Dr. Ozlem Anlim wergirt.
MAŞÎNEYÊN KAR DIXEBITIN
Şaredariya Bajarê Mezin 2 wesayîta xilaskirinê, eskuvatorek, 2 heb tankerên avê, 2 heb kamyon, vîdanjorek, pîkabek û 4 otobês gihand Erdîşê; otobosêk bi veguhestina rêwiyên navbera Eganîs-Erdîş, 3 otobês jî dê li navenda Erdîşê bêpere xizmet bikin.
Dema Baydemîr û Kişanak serdana hemwelatiyan dikirin û yekser agahî ji xebatên xirabeyan werdigirtin, bersiva pirsên rojnamegeran jî dan. Hevseroka BDP’ê Gultan Kişanak diyar kir ku erdhej bû sedema mirina gelek hemwelatiyan û bi hezaran kes jî birîndar hene.
XEBATÊN XILASKIRINÊ TÊR NAKE
Kişanak ji Erdîşa ku destpêkê çûyê mînak da û got: “Careke din derket holê ku em di xebatên xilaskirina erdhejan de tevdîr/bergirî her nîn e. Xebatên lêgerîn û xilaskirinê li Erdîşê pir dereng dest pê kirine, digel ku li Erdîşê nêzî 100 bînahî hilweşiyane, xebatên lêgerîn û xilaskirinê di demjimêr 22:00’an de tenê li 3-4 xalan dest pê kirin.
Kişanak ê bergiriyên dewletê rexne kir û got ku di warê pêşwazîkirina pêdiviyan û amadekariyan de kêmasiyên pir mezin hene, kêmasî û pirsgirêkên koordînasyonê hene. Kişanak rexneyên xwe wiha domand: “Li Erdîşê pir dereng dest bi xebatan hat kir; hem kêmasî hebû, hem jî koordînasyon tune bû. Hem kesên xebatên lêgerînê didomandin, ne pispor bûn. Di warê xilaskirina kesên sax de kêmasî zêde ne. Piştî erdheja 17’ê Tebaxê digel ku li Tirkiyeyê herî zêde erdhej hat axivîn, hat dîtin ku Tirkiye li hemberî karesata erdhejê tu amadekariyên wê tune ye. Derket holê ku dewletê di vî warî de tu bergirî wernegirtiye. Wer dixwiye ku dê gel bi xwe van birînên xwe kew bike.”
Kişanak bang li Saziyên Civakî yên Sivîl (SCS) û şaredariyên BDP’ê kir ku di warê alîkariyan de helmetên xwe mezintir û bihêztir bikin; divê hemû gel li gund, navçe û bajarên lê dijîn beşdarî van helmetan bibin. Kişanak ji gel daxwaz kir ku tevlî torên helmetên alîkariyê ku şaredarî, partî, SCS’yan ava kirine, bibin.
ANF
***
Nûçeyên eleqedar:
- Ji Wan û Erdîşê notên rojekê (24.10.2011)
- 13 rojnameyan ev wêne weşand
- ÇGD: Dawî li nijadperestiyê bînin
- Yuzde Yuz Futbol ji bo Wanê kurt dom kir
- Çapemeniya tirk û erdheja Wanê
- Li ser erdheja Wanê agahiyên nû
- Şaredariyên BDP'ê ji bo Wanê seferber bûn
- Saet 19.00: Li Wanê hejmara miriyan zêde dibe
- Şaredarê Erdîşê: Em bi lezgînî li benda alîkariyê ne
- Dîroka erdhejên ku li Wanê pêk hatine
- Saet 16.00: Agahiyên dawî li ser erdhejê
- Saet 15.00: Li Wanê 50 birîndar hene
- Saet: 13.61, li Wanê erdhej çêbû