DiyarName.Com

2020: Lîsteya pirtûkên ku li Rojava derketine

Dîrok : 05 01 2021 | Beş :

Ferîd MÎTAN

Rojavayê Kurdistanê di sala 2020'an da, bi weşanxane û rêxistin û nivîskarên xwe ve tenê 31 pirtûkên kurdî weşandine.

Vîrusa coronayê li gel bêaramîya rewşê, kir ku lîsteya weşanên nû bi carekê ve li kêmê bikeve û tevgera weşangerîyê bi temamî sist û qels bibe.

Di vê lîsteyê de; weşanên 3 weşanxaneyan, 2 yekîtîyên nivîskaran, navendeka wergerê û pirtûkên ku bi çapeka taybet ve derketine, cih digirin.

Herî zêde AVA'yê pirtûk derxistine

Ji wan 31 pirtûkên ku derketine, Weşanxaneya Avayê ya navenda wê li Kobanî yê, bi 10 sernavan herî zêde pirtûk çap kirine. Weşanxaneya Şilêrê jî bi çapkirina 7 pirtûkan di rêza duyem de ye û ji nivîskaran herî zêde Konê Reş xwedî berhem bûye, lewra wî 3 pirtûk weşandine.

Dîsa helbest

Her wekî sala 2019'an, di 2020'an de jî herî zêde pirtûkên helbestan hatine çapkirin. Di lîsteya pirtûkên 2020'an de 10 berhevokên helbestan serê lîsteyê digirin.

Balkêş e ku di 2020'an da 5 pirtûkên wergerandî hatine weşandin, çimkî di 2019'an de tenê du pirtûkên wergerê hatibûn çapkirin. Bi wergerê re, berhemên bîranînan jî 5 heb in, roman 4, her yek ji çîrok û jîyanname û folklorê 2 û pirtûkeka dîrokî.

Di nav weşanên 2020'an da, tu pirtûkên rêziman, ferheng, zanist, şano, rexne û wêjeya zarokan nayên dîtin.

Proseya çapê bêserûber e

Bi qasî ku haya me jê heye û em dişopînin, weşanên Ava û Neqşê ne tê de, her çi pirtûkên ku di vê lîsteyê de cih digirin, bi pirsgirêkên kalîte û bêpergalîyê re piranîya wan an bi 50 yan jî bi 100 nusxeyî ve hatine çapkirin

Tenê li Rojavayê û çapa yekem

Berhemên nivîskarên rojavayê Kurdistanê ku li derve hatine çapkirin, her wiha berhemên ku li rojavayê Kurdistanê û ji bo cara duyem li çapê ketine, di vê lîsteyê da cih nagirin.

Ferq û cudahiya di navbera lîsteyên 2019 û 2020'an de ew e ku di vê lîsteyê de berhemên ku bi çapeke taybet ve derketine, li lîsteyê hatine zêdekirin.

* Pirtûkên kurdî/kurmancî yên ku di 2020'an da li Rojavayê Kurdistanê hatine weşandin:

Weşanxaneya Avayê

1- Penageh/ roman/ Merwan Berekat

2- 55 çîrokên 35 salan/ çîrok/ Şahînê Bekirê Soreklî

3- Destxeta Petersburgê/ roman/ Jan Dost

4- Çûkan zimanê min xwar/ helbest/ Ciwan Qado

5- Arvanekî ji peyvan/ helbest/ Ronî Elî

6- Rûmet/ roman/ Vejîna Kurd

7- Kobanîya min/ helbest/ Salih Demîcer

8- Hestên axê/ helbest/ Xebat Şakir

9- Teyar û xezalê/ folklor/ Heysem Mislim

10- Kurd li gor rewşenbîrên ereb/ hevpeyvîn, erebî/ Salar Osê/ Wergera ji erebîyê: Şêrzad Besrawî

Weşanxaneya Şilêrê

1- Mehên Salê/ çîrok/ Birek nivîskar

2- Soryaz 1-2/ roman/ Dîyar Bohtî

3- Serket/ bîranîn/ Husên Engîzek

4- Keça Cûdîya serhildêr/ bîranîn/ Peyman Bêrî

5- Peyvên zêrîn ji kultûra rengîn/ folklor/ Mecîdê Xezê

6- Memê Axê/ jîyanname / Fatma Sîdo

7- Şahidê berxwedanê/ bîranîn/ Cemîl Mezlûm

Weşanên Neqşê

1- Mirîşka ku divîya bifire/ roman, îngilîzî/ Son Mî Hiwang/ Wergera ji îngilîzîyê: Dîyan Cemîl, lêanîna kurmancîya latînî: Izedîn Mihemed

Navenda Mezopotamyayê ya Wergerandinê

1- Textê Peqlaweyê yê xemgîn/ roman, erebî/ Nebîl Milhim/ Wergera ji erebîyê: Ferîd Mîtan

Yekîtîya Rewşenbîrên Herêma Cizîrê

1- Gava mirî dimirin/ helbest/ Ardilan Abdo

2- Peyala xema/ helbest/ Mihemed Sîno

Yekîtîya Nivîskarên Kurdistana Sûrîyeyê

1- Ji bîrdanka dîrokê/ jîyanname/ Luqman Yûsiv

2- Koça dawî/ roman, erebî/ Mihemed Zekî Yûsiv/ Wergera ji erebîyê: Evdilhekîm Mihemed

Çapên taybet

1- Raburdû û nihoya weşandina pirtûkên bi zimanê kurdî li Tirkîye û Sûrîyeyê/ lêkolîn, îngilîzî/ Mehmed Malmîsanij/ Wergera ji îngilîzîyê: Dilovanê Deştê

2- Jîyana Oxirê/ helbest/ Zahid Mehmûd

3- Sawa Evînê/ helbest/ Zahid Mehmûd

4- Qamişlo-Pol/ helbest û pexşan/ Konê Reş

5- Ji ger û serdanên min/ bîranîn/ Konê Reş

6- Ji tûrikê min/ bîranîn/ Konê Reş

7- Şoreşên gelê kurd... rastî û sedemên hilweşînê/ dîrok/ Berzanî Ferman

8- Raperîn/ helbest/ Xembar Gul

Têbinî: Hevalê me Ferîd Mîtan ev lîste amade kiriye û di bloga xwe de (ferid-mitan.niviskar.org/) jî weşandiye.

Ji bilî destûra fermî ya Ferîd Mîtan û Diyarnameyê kopîkirina vê lîsteyê qedexe ye.

***

Nûçeya Eleqedar:
- 2020: Femo lîsteya hemû pirtûkên bi kurdî

Nûçeyên li ser 2020'an: