Herhal serey neway û jo bî. Xebere hamî go dewicî dew bi dew bêrê têhet û heta Licey reyra şorê û çalakî virazê. Ez tûta. Ez nêzana mesela çi ya. Tûtê zey mi heme nêzanê. Pîlî çiqa zanê ez nêzana. La reyraşiyayiş viraziya. Tûtî, pîlî, extiyarî... Her sere ra merdimî estê. Dewê Pêşê Kevirî û dewê bînî jî helbet heta verê Licey kewtî rey. Reyraşiyayîş de ma wirdî giştê xo kerdê berzî, bi enî gîştan ma nîşaney serkewtinî motê ra û ma diruşmî jî eyştêne. Nizdê Licey de eskeran ma vindarnay. Zehf tay, nîno min vîra çiqa ma vindertî la xebere miyanê ê reynayiyayîş organîze kerd bî ra hamî û vatî, "Reyraşiyayişê ma bi ser kewto, ma geyrenê a."
Serkewtin çi bî? Ma çawey ser kewtî bî ez nêzana. Xora joy pers nêkerd zî. Ma geyray a. Bi silametî ma geyray a. Extiyaran miyanê xo de xeber dayne. Diyalogê yînan (zehf tay) anekî bî:
- Ma dewlete waşte, enî hukmatê bêbabî nêda ma.
- Ti zanê çirê nêda ma?
- Nê.
- Ma wirdî gîştê xo kerdê berzî, ma di dewletî waştî, ma jo dewlet biwaştêne ga bidê ma.
Erê, ê xaloy wirdî gîştan ra di dewletî fam kerd bî û peynî de bi a reyraşiyayîşî dewlete nêkewtebî destê yînan.
Dimara dewicî weko bîn jî kewtî reyraşiyayişanê aneyînan. Heniyan de eskeran day înan ro, serey yînan şikitî, heniyan de rehet geyray a. La her game û heta enka jî ew reyraşiyayişê yînan dewam kerd.
Enka ene mesela çi ya ra veciya? Tiya ra: Wexto Kemal Kiliçdaroglu Enqera ra heta Stenbol reyraşiyayişê xo da dest pa kerdin a mesela hame mi vîrî.
Suleyman Demirelî vat bî, "Bi reyraşiyayişî rey nêqedêna."
Eno vatişê Demirelî qeybî Kiliçdaroglu jî derbas beno. Egir ew gamanê bînan nêerzo, bi reyraşiyayişî tenî go nêşko çîke bikero. Henî semedê Kiliçdaroglu jî Hemserokê HDP'î Sehalattin Demîrtaş û mebûsê yînan giroteyê. Yê meclisê de biryar "erê" kerd û madey destnêdayişê mebûsan hame betalkerdiş.
Kiliçdaroglu binê reyrayişê xo nêkero pir, heta verê HDP'yiyan jî nêşoro, yînandir rey xo nêkero jo reyrayişê yê go nêbo çîke.
Reyrayişê ma jî ana bî. Kokê xo xurt nêbî û ma nêşka berê sere. Yê Kiliçdaroglu jî anawo. Egir ew kokê reyrayişê xo xurt nêkero, go enî gamê ê bibê tenî xeberî qeybî miyanê Tirkiye û teberî; weko bîn çîke nêvirazêno. Hendî ew zano. Wisa heyseno Rojhilato Miyanîn de kam kurdan dir kar bikero ew bi ser kuno. Yê bînî tenî tarîx de manenê.