A rast ji devla pênûsê hewceye ez bibêjim klavyeya gêj, lê belê nivîs û pênûs bo ku bi hezar salan e rêhevalên hev in; dema nivîs-nivîsadin hebe pênûs tê ziman. Bo wê çendê ez çiqas bi klavyeyê binivîsînin jî dîsan jî pênûs xwediyê nivîsandinê ye!
Baş e ka ez li mijar û meqseda mijara xwe vegerim. Ez bawer im ev rewşa eletewş û nediyar hatibe serê gelek nivîskarên xwedî pênûs. Ango gelek caran pêvajo dibe sedem ku êdî pênûsa mirov giran dibe û wekî gêjan nema dizane çi binivîse. Û ev rewş bawerim herî zêde tê serê nivîskarên ku li Rojhilata Navîn dijîn.
Wekî rojeva ku niha li Tirkiyeyê ava bûyî dibe sedem ku mirov tevlîhev bibe! Ji aliyekî ve hilbijartina pêkhatî, ji aliyekî ve encamên ku bi goman û tevlihev û dîsa ji aliyekî ve keda bi salan a siyaseta kurd dimeşîne û encamên wê; mirov dixe navbera labîrentê û rê li mirov dide ji bîr kirin! Rewşên aloz û kaotîk dibin sedem ku derdora mirov bibe mij...
Îca dema mirov ji pênûsa xwe daxwaz dike bo nivîsandinê, pênûsa mirov nema dizanê çi binivîse û sergêj dibe. 15 Gulanê Cejna Zimanê Kurdî hat û çû ji aloziya rojeva hilbijartinê kêmek çalekî bo vê roja pîroz hatin kirin, ango pênûsan ev roja ziman jî derbasî rojevê nekirin! Pênûsa min bi xwe jî dil hebû li ser Cejna Zimanê Kurdî binivîse û qedrê zimanê kurdî bilind bike, bes ji giraniya rojeva sar, roja ziman hat û çû hêj pênûsa min wekî gêja nezanî çi binivîse.
Dema li ser encamên hilbijartinê difikirim û hawara xwe digihîjînim pênûsa xwe bo ku ji nav rojevê derkevim pênûsa min hêrs dibe. Bo ku encamên vê hilbijartinê ne tenê îro ye! Êşa encama vê hilbijartina ku li gorî hile-pîleyên desthilatê çêbûyî dê sed salan bandora xwe çêbike. Bo ku ev desthilat dema hatî ser kar û heta roja îro ango sala 2023’an armanceke stratejîk danîbû pêşiya xwe ku dê di sedsaliya komarê de komarê bi giştî fetih bike û li gorî rengê îslamîzma hişk bingehê sedsalekê bavêje. Ji vê sedemê, dema mirov li ser encamên vê hilbijartinê difikire pênûs yekcar hêrs dibe, gêj dibe û naxwaze bawer bike, lê belê ya ku diyar dibe ev hêza desthilat dê ji bo rengê xwe bide qebûl kirin bi her awayî pergala xwe hişk bike û li civaka xwe bide qebûl kirin!
A ku ji me jî were ew e ku em li deruniya pênûsa xwe xwedî derkevin û bi zimanê xwe keda xwe binivîsin û hey binivîsîn, ta ku keda me veguhere hêzeke mezin û li hember faşîstên dijberî me raweste. Di dîrokê de hatiye piştrastkirin ku pênûs ji hemû çekan xurtir e û dema pênûs raneweste bi xwe re guhartinên serkeftî tîne. Lê divê qedrê pênûsê baş were zanîn û kesên ku hêza jiyana xwe ji pênûsê nagirin yekderb li pênûsê vegerin û xwe bi wê hêz bikin.
Spas ji pênûsa min re ku heta encamê vê nivîsê bi min re bû û gêjbûna xwe ji ser xwe avêt. Dem dema nivîsandinê ye êdî...
.jpg)
.jpg)
.jpg)
