Merdim çi rê û çawey eşkeno 30 serrî zere de, mîyanê çar dêsan de bimano? No çi sûc o? A çi ceza ya?

Ez, erê ez…

To va namey to?

Qey zehf muhîmo nameyê mi? Nê, qet muhîm nîyo. Ez Abdulrezzak (1), ez Xelîl (2), yan zî ez Salih (3)… Ma ferq keno, nameyê mi çi bo. Ez, erê ez kurd a. Zey bi hezaran kurdan înan ez zî girewta û ez zî eşta mîyanê çar dêsan. Ne rojêke, di roje, ne serrîyêk, di serrî, ne des serrî, vîst serrî. Ha hîris serrê mi temam beno hepis de. Bi reqem “30” serrî. Bi nuşte “Hîris” serrî. Çarinan ra joy zêdeyêrî yê se serrî…

Qet şima zanê ê dêsê serdinî ê hepisxaneyan tesîrêke seyîn ro canê ma kenê? Di payîzan û zimistanan de ew hewawo serdin çawey xo ro ma pêşeno û ma esîr gêno? Zerey ma de zelzele virazeno. Şima zanê ew hewa çawey serdin o? Ew hewa û ew serdê dêsan beno jo, û çawey di mîyanê çende serran de gurçikanê ma eceqnenê? Şima zanê ê çawey tesîr ro kezeba ma kenê?

Wexto ke hamnan zî yeno di mîyanê ê dêsan de germ ra ma nefes nêgînê. Qet şima şinawito zehfê rey ca çinêbiyo ke ma rakoyî? Weşt bîbî ma nefes nêgirewt, ma nêşka rakun. Hayîya şima te ra esta wext bîbî ma veyşan kewtê ra?

Erê ti demî vîney (îrade) ma nêşikayawa. Erê ma her serbilindî biyê, erê ma her xo ver da. Ma serê sibayan wiştê we spor kerdê qeybî bedenê xo xurt bigîrê; erê ma volta eştê qeybî guney ma bigeyro, la ene xebate eşkena çende serrî xo ver bido?

Ma eşkenê çende serrî xo ver bidê?

Ez vana qey xebere yena heta verê goşê şima zî hepisxaneyan de zehf tenê ke bi desan serrano girewteyê estê û ê nêweş ê, ê verî mergî de yê… Ez vana qey şima zî şinawito ke zehfê saziyanê sivîlan veyndayo hikumetî ke, yanê enî nêweşan veradê, la hikumet game nêerzeno. Û yew bi yew ma ra, mîyanê ma nêweşan ra merdimî xatir wazenê. Tenî eno hewtewo peyîn de hîrinan xatir waşt…

Erê nameyê mi muhîm nîyo. Hema ez Abdulrezzak, Xelîl, ya zî Salih… Ez, ê merdimê hepis de, înan ra zo, nêweş…

Nêza şima vanê çi? Go roj û dewran ma rê zî ageyro? Egir ageyro kînga? Heta çende tenê bînî bimirê?

***

1-Abdulrezzak Şuyur roja 14.12.2021 de Hepisxaneyê Şakranî ê Alîaga ê Îzmîrî de merd. O 93’î ra nata hepis de bî.

2- Halîl Guneş roja 15.12.2021 de, Hepisxaneyê Amedî de merd. O zî serra 93’an ra nata hepis de bî.

3- Salih Dogrul serra 96’an de amebî girewtişî, serra 2007’an de hepisxane de felc bî, vîrê xo kerd vinî. Dimayê 18 serran di serra 2014’î de ame veradayişî, la hendî çare çinêbî. Wexto ke Mêrdîn de tedawî vînayêne, la merd.

Ene nişte verî rojnameya Xwebûn de hamiya çapkerdişî.