Dembaş

Piştî demeke dirêj, vaye dîsa ez vegeriyam Diyarnameyê..

Ev veger hinekî cudaye, ya rast veger di demeke cuda de ye..

Rojavayê welat di nava lehiya xwêdanê de li ber xwe dide.

Rûreşiya hinek saziyên ragihandinê gihaye zîrveya bêexlaqiyê..

Hinek rewşenbîr di nava kînê de xwe winda kirine û di nava dijşoreşa azadiyê de avjeniyê dikin..

Çand û huner li ber lingan diçe û tu kes nikare xwedî lê derkeve..

Mirov ji ku dest pê bike?

Ezê ji xaleya ku niha vê kêliyê di serê min re derbas dibe, dest pê bikim..

Cenev 2 û bêdengiyek naletlêhatiya ya beşeke kurdan..

Amerika zoreke mezin dide ser dinyayê ku tenê du beş li konfernsa Cenev 2 amade bibin, yek Rejima Sûrî, ya din Rikberî..

Ev konferans bi xwe di navbera Amerika û Rusya de ye, wê her du dewlet di xaleyên cuda de, xwe ji hev re daxin û wê rejim dewam bike..

Sedem jî ew e ku her du jî dizanin, Rikberî bi vê rewşa xwe ya tevlihev, ku her çend kes fikrekê diparêzin, nikarin rejîmê daxin û bibin alternatîf.

Sefîrê amerikî Ford, yê ku bi pirsa Sûrî re mijûl e, ji Rikberiya Sûrî ne çêtir e, belkî di dîroka Amerika de, mirovê herî ehmeq e ku wezîfeyeke wiha nazik dimeşîne..

Helbet ev jî bi zanebûn hatiye wezîfedarkirin..

Tirkiye amedeye ku her tiştî bike û bêdeng be, tenê ji bo kurd bi heyetek serbixwe neçin konferansê...

PYD israr dike ku kurd bi navê Desteya Bilind beşdarî civinê bibin..

ENKS wê tev koalîsyona ku bi gelekî ji Rejîmê pîstir e, here wir...

Eger hat û wiha bû ku tenê Rejîm û Rikberî li hev bicivin, Cenev dibe Lozan û kurd dîsa winda dikin..

Ne Amerîka, ne jî Rikberî ne amadene ku pirsa kurd bînin rojevê, ev yek pir vekirî her du hêlan dan xuyakirin..

Wekî wiha ye, çûyîna kurdan ji bo çi ye?

Kî wan di nav koma Koalîsyonê de mecbûrî çûyînê dikin?

Ên ku dizanin wê encam Lozan be, çima vê liva naletlêhatî dikin?

Gelo ji bo ku Tirkiye û Amerika razîbin, hêjaye em parçeyekî welatê xwe, ku sê parê wê rizgarbûye û heta ji bo serxwebûnê jî amade ye, bifroşin?

Rikberiya ku nikare "Rêberiya Xweserî ya Demkî" ya kurdan tehemûl bike û tohmetên herî giran avêtin stûyê kurdan, wê çawa bi federaliyê qayilbe?

ENKS ya ku digot Federalî, newêre ji tirsa Tirkiye û Koalîsyonê tevlî Rêveberiya Demkî bibe, ne tenê wiha, her roj li ser ekranên TV'yên ereban dijminaya Xweseriya Demkî dikin..

Ev xweserî ku navê wê  "demkî" ye û di planê de hilbijartin hene, yanî heya demekê wê wiha be, piştî hilbijartinê kî bi serket dê rêveberiyê bikin, çima ENKS jê ditirse? Di civina van rojên dawî de, Meclisa Gel israr dike ku ENKS tevlî vê  Rêveberiyê bibe, lê bi taybetî Partiyên ku girêdayî PDK û Koalîsyona Sûrî ne, li dij derdikevin...gelo ev ne nakokiyên kuştinê ne?

Mijar wiha pir in ku mirov dixwaze her tiştî bi yek carê re bêje..

Ka bila ev bibe silava vegera min a Diyarnameyê..

Heya nivîseke din..