Ma tûtî bî. Ma dew de bî. Caw ma tede vazdin zehf bî. Cay kay ma bîbî la qet çiyê ke ma pê kay bikerê çinêbî. Ga kam şoro bajar û marê çiyanê pêkaykerdişî biyaro? Jo bişiyayne jî pere çinêbî marê çiyanê kayan bigîrê. Egir gogêke joy biardêne jî qeybî nêteqo ma haydar bîne. Wexto goge biteqayne kay ma nîmede mendêne. Rewş anekî bî.
La ma tûtê biaqilî bî. Ma xo bi xo çî kay viraştêne û pê kay kerdêne. Zey nimûne; ma potikî û naylonî kerdêne miyanê naynolêke, fek girotêne, kerdê gilor û zey ke goge bo ma pê kay kerdêne.
Ma têlî bivînayne yînan ra ma erebey veraştêne. Ma bi herî (çamûr) keyey viraştêne. Û ma herî ra erebey viraştêne. Gava erebe bibo gere tekerê cê jî bibê nê? Erê, gere tekerî bibê. La tekerê ma çinêbî. Ma go sekerê? Ma a mesela jî hel kerde bî. Dewde ceryan çinêbî, bav û kalanê ma fenerî (elektrîkê destan) girotêne û tede pîlî bîbî. Voltê ê pîlan 1.5 bî û pîlî bi xo girdî bî. Wexto enerjî miyanê pîlan de qediyayne, yînan eyştêne, ma jî yê pîlî girotêne, şiknayne û hetê jorê yê pîlan de parçeyke lastîk ê gilor bîbî, zey tekerî bî û ma ê qeybî tekeranê erebanê xo şoxilnayne.
Hendî erebey ma yê herîra hedrey bî û ma pê kaykerdêne.
Helbet miyanê pîlan de madey jehrî bîbî. La ma çi fam kerdêne ke tede çi esto, çi çiniyo... Ma rê ê pîlî lazimî bî ke mo go tera tekerê xo bivetêne. Weko bîn ma nêzanayne pîl çiqa muhîm ê.
Çiqa ma bî pîlî, endêke ma fam kerd ke pîl çiqa muhîm o, miyanê pîlan de jî madew zirar bido ma tûtan esto.
Şima enka pers bikerê meselay pîlî çiyara veciya?
Ez vacî:
Hemşaredarê Bajarê Mêrdînî Ahmet Turk rocê 21.11.2016 de hame girotişî û ew kerd heps. Qelbê Turkî de pîl esto. Parêzerê Ahmet Turkî parêzer Erdal Kuzu va ke (30.12.2016) pîl qelbê Turk de esto, qontrolê yê normal jî nîno kerdiş, rewşê ê baş niyo. Parêzer Erdal Kuzu enî çî jî vatî: "Di çimê yê rastî de katarakt viraziyawo. Dixtorî vanê katarakt raver şino û gere miheqeq bêro emeliyetkerdiş. Emeliyet bibo jî heps de rewşê hijyenî çiniyo. Mixabin heps de no çî mimkûn niyo."
Erê, pîlê qelbê Ahmet Turk ê 74 serî de ez berda 7 serî, seranê ke ma pîlan re tekerê xo vetêne.
Ma hêvî bikerê ke kek Ahmet Turk gamêke leze bêro veradayişî û jiyaney ê nêko miyanê talûkî.