Serokwezîrê tirk Erdogan bang li kurdan kir ku welatên xwe biterikînin.
Lê wî navnîşîna çûyînê nedaye…
Lê belê hezkirina hatina kurdan a Almanyayê her kes dizane…
Û belkî hinek kesan jî ji ber gotinên Erdogan niyeta xwe bi hatina Almanyayê xera kiribe.
Ez jî wekî kesekê li Almanyayê mezin bûyî dibêjim neyên vê derê!
Ji xwe riyên hatinê hesan bin jî, mayîna li vir êdî ne hesan e.
Êdî serîlêdanên penaberiyê zû bi zû nayên qebûlkirin.
Di destê we de tenê ma hatina bi riya zewacê…
Ji bo zewacê jî divê hûn herin kursên almanî.
Ger hûn hatin jî serê we û ya/yê hûn pê re bizewicin wê ji hev du negire.
Sedema bingehîn yê vê yekê ew e ku zimanê we yek be jî, hûn xizim û mirovên hev jî bin, hûn bi du çandên cuda mezin bûne…
Vêca bifikire ka kesa/ê tu li Almanyayê pê re zewicî di dimeke pevçûnê de bibêje te: “Tu bi xêra min bûyî însan, te bi xêra min pasaport stand… »
Wî wextî êdî ne poşmaniya hatinê fêde dike û ne jî veger ; ji xwe ji bo vegerê jî êdî dereng e. Ez dibêjim ji vegerê re dereng e, ji ber kesê fêrî jiyana Almanyayê bû, ew êdî xwe wekî miqnetîzê bi vî welatî ve girê dide.
Ne tenê ev, hê bi dehan sedemên ku hûn neyên vî welatî hene…
Demsalên vî welatî nîn in. Tu dikarî di rojekî de sê-çar demsalan bijî.
Mirov sar in…Kurdên vê derê jî di nava demê de “bi vê sermayê ketine”…
Têkiliyên bi almanan re? Tu bi salan di xaniyekî de dijî lê tu navê cîranê xwe nizanî…
Belkî hûn bibêjin: “Ma min çi ji almanan e, ew qas mirovên min li wê derê dijîn…”
Ji xwe bi awayekî sergirtî jî be, ji ber vê yekê ez dibêjim neyin!
Madem hûn dixwazin wekî mirovên xwe yên li vir werin vî welatî lê xwe fêrî ziman, çand û jiyana Almanyayê nekin, neyin…
Ji ber welat wê ji we re bi vî awayî ji Almanyayê xweştir be…Kurd û xizmên we ji xwe li welêt bêhtir in. Û bila di navbera me de be, kurdên Almanyayê jî di nava demê de “bi vê sermaya almanan ketine”…
Li vir ma meseleya pereyan û mîsogeriya ewlekariya jiyanê ya li Almanyayê…
Rast e jiyan li vir di bin ewlekariyê de ye lê belê zemanê peredanhevê derbas bû. Di wextên ‘Mark’an de pere pir bûn. Lê Euroyan her kes feqîr kir…
Ji xwe êdî sosyal hewante pereyan nade tu kesî. Heta ji wan were xelkê ber şixul re dikin û nahêlin pereyên sosyalê bi rehetî di qirika kesî re derbas bibin…
Bila şaş neyê fêmkirin…Ez ne li dijî hatina tu kesî ya Almanyayê me û ji xwe ev der ne li ser navê min firaxet kiriye…
Lê madem di dil de derbaskirina jiyaneke wekî jiyana li welêt ji bo Almanyayê tê fikirandin, bila mayîna li welêt be û ne hatina Almanyayê be…
Na, hûn bibêjin “ezê her dem zanibim ji ku derê hatime û li ku derê dijîm”, êdî hûn dizanin û êdî meseleya we û ya Erdogan e.
*Hakan Aksay di nivîsa xwe ya 13.11.2008´an ya di Tarafê de bi awayekî mecazî bang li kesên ku dixwazin ji ber daxwaza Erdogan welêt biterikînin, wekî wî herin Moskowayê. Ev nivîsa wî bû sedem ku ez sewqî vê nivîsê bibim.
.jpg)
