HEWLÊR

Rêxistinên saziyên civakî yên sivîl li başûrê Kurdistanê diyar kirin ku hikumeta Herêma Başûrê Kurdistanê rê nade wan ku alîkariyan derbasî rojavayê Kurdistanê bikin.

Endamê komîteya Alîkariya bi Rojava Şoreş Emîn diyar kir ku wan bi armanca alîkariya gelê Rojava bikin ji bajar, navçe û bajarokên başûrê Kurdistanê 30 hezar dolar kom kirin û bi pereyên kom kirine derman û alîkariyên mirovî kirîne û xwestine derbasî rojavaya Kurdistan bikin. Emîn, destnîşan kir ku rayedarên hikumeta Başûrê Kurdistanê ji beriya 17 rojan ve bi hinceta ku di pira sînor ê Sêmalaka de pirsgirêk heye rê nade wan ku alîkariyan bighînin xelkên xizan li Rojava. 

Emîn da zanîn ku wan berî çend rojan ji Serokatiya Herêma Başûrê Kurdistan xwestine ku alîkariya wan bike û alîkariyan bighînin Rojava, lê heta niha tu bersiv negirtine.

Derheqê girtina sînor Emîn diyar kir ku ew di wê baweriyê de ne ku girtina sînorê Sêmalka, bi armanca valakirina herêmên Rojava pêk hatiye. Têkildarî mijarê hin sazî û dezgehên mirovî yên başûrê Kurdistanê diyar kirin ku wan berî mehekê alîkarî û pêdiviyên tenduristî ji bo Rojava berhevkirine lê, ji ber girtina deriyê sînor nikarin alîkariyên ji dermanan û pêdiviyên mirovî pêk tên bighînin rojavayê Kuridistanê.

Ji ANHA'yê hatiye girtin