Diyarname

Galaya belgefîlmê Veysi Altay ê bi navê "Dayika Berfo" li Kent Sinemasiya Şişliya Stenbolê bi beşdariya sedan kesî li dar ket

Berfo Kirbayir ev 33 sal bûn ku li kurê xwe Cemil Kirbayir ku di 13'yê rezbera 1981'ê de hatibû binçavkirin û hatibû windakirin digeriya. Berfo Kirbayir heta 105 saliya xwe bi hesreta dîtina kurê xwe, yan jî hestiyên kurê xwe jiya. Lê bêyî ku bigihîje vê daxwaza xwe par wefat kir. Derhênerê kurd Veysi Altay li ser Dayika Berfo û helbet kurê wê belgefîlmekî bi navê "Berxwedana 33 salan Dayika Berfo" kişand. Galaya belgefîlm li Kent Sinemasiya Şişliya Stenbolê li dar ket. Mebûsên BDP'ê Pervin Buldan û Sirri Sureyya Onder, Serokê Enstîtuya Kurdî ya Stenbolê Zana Farqînî, sînemager Yusuf Çetin, nivîskar Fehim Işik, derhênerên kurd Omer Leventoglu, Cemil Oguz, Aziz Çapkurt, parêzvana mafên mirovan Eren Keskin, hunermendên NÇM'ê, kurê Dayika Berfo Mikayil Kirbayir û gelek kesên din li galayê amade bûn.

Piştî temaşekirina belgefîlm bi pêşkêşvaniya lîstikvan Rûgeş Kirici, gotûbêjek li dar ket. Kurê Dayika Berfo Mikayil Kirbayir li ser diya xwe û birê xwe yê windakirî Cemil Kirbayir axivî. Kirbayir wisa got: "33 sal berê îro em tevî Cemil bûn. Me ew cihek veşartibû, me kincên xebatkarekî daristanê peyda kiribû ku em lê bikin û ji wê derê birevînin. Malbatê nexwest, got bireve dê wî biqufilin û bikujin. Lê heman şevê li ser gilîkirinekê leşkeran avêt ser wir û ew girtin bin çavan. Ew birin Qersê. Hema meha kewçêrê li wir bû. 8'ê kewçêrê de gotin 'reviyaye'. Bavê min ji revîna wî bawer dikir, belkî dixwest wisa be jî, lê min got xwe ji bo fikra kuştinê qanî bikin. Di 14'ê mehê de jî min ji wir sirgûn kirin. 31 salan ji me re gotin ku ew reviya ye, lê derew kirin. Derbeya 12'yê Rezberê civat hînê çanda derewkirinê kir." 

Her wiha mebûsa BDP'ê Pervin Buldan û parêzer Eren Keskin jî di şevê de axivîn. Herî dawî derhêner Veysi Altay derket ser dikê û sipasiya xwe ji bo mêvanan kir. Altay li ser zihniyeta dewletê jî got ku dewlet neguheriye, ger hin belgefîlm têne kişandin, hin tişt têne ziman, ev jî bi hêza me ya ku çêbûye ye, ne ji ber guherîna dewletê ye. Altay bal kişand ser çalakiyên Dayikên Şemiyê û got: "Ev 450-500 heftene ku ew her çalakî li dar dixin. Ger ew nebana ev berhem dernediket holê. Ew lehengên min in."