Diyarname
Komeleya Lêkolînên Çand, Dîrok û Wêjeya Devkî “SOZDER” ji bo 15’ê Gulanê Cejna Zimanê Kurdî li gelek bajar û navçeyên Kurdistanê û Tirkiyeyê çalakiyên balkêş li dar xist. Armanca sereke ya van çalakiyan bilindkirina hişyariya zimanî û daxwaza statuya fermî û perwerdehiya bi zimanê kurdî bû.
Çalakiyên li bajaran
Di çarçoveya pîrozbahiyê de, SOZDER'ê pankart û belavokên bi sernivîsa “Statuya Kurdî Perwerdehiya bi Kurdî” û gotina Celadet Alî Bedirxan, “An bi kurdî biaxivin an jî nebêjin em kurd in”, “15 Gulanê Cejna Zimanê Kurdî Pîroz be!” amade kirin.
Van pankart û belavokan ji aliyê rêveber û endamên SOZDER’ê ve li navenda Mêrdînê û navçeyên wê Qoser, Dêrik, Şemrex,Nisêbîn û her wiha li bajarên Batman, Riha, Edene û Stenbolê hatin belavkirin. Belavok bi taybetî li sûk, bazar û nav esnafan hatin parvekirin da ku hişmendiya zimanî di nav civakê de bê zêdekirin û zimanê kurdî bêtir bikeve rojevê.
Banga Hevserokên SOZDER’ê
Hevserokê SOZDER’ê, nivîskar Eyup Guven, di axaftineke xwe de bal kişand ser rewşa zimanê kurdî û girîngiya parastina wê anî ziman. Guven got: “Zimanê me yê zikmakî, bi taybetî zaravayên kurmancî û zazakî, li Tirkiyeyê di bin xetereyeke mezin de ye.” Wî destnîşan kir ku gotina Celadet Alî Bedirxan ji bo wan bûye bingeh: “An bi kurdî biaxivin an jî nebêjin em kurd in!”
Hevseroka SOZDER’ê Gulîzar Seyhan jî bang li hemû kurdan kir ku zimanê xwe di her qada jiyanê de bikar bînin û biparêzin. Wê her wiha diyar kir ku SOZDER ji roja damezrandina xwe ve xebatên xwe bi awayekî rêk û pêk dimeşîne û wan wekî rêveberî raportekê amade kiriye da ku hem endamên komeleyê hem jî raya giştî ji van xebatan agahdar bibe û pê re got. “Ev yek şefaftî û dilsoziya SOZDER’ê ya ji bo doza ziman nîşan dide. Em ê xebatên xwe yên zimanî di her warî de û di nava gel de bi gel re bimeşînin. Bi vê xebata me re ez bang raya giştî dikim ku teqez em bi zimanê xwe bidin û bistînin. Bila zimanê me bibe zimanê bazarê, zimanê dan û stendinê û zimanê siyasetê. Bi kurtasî zimanê jiyanê.”
Xebatên bênavber ji bo zimanê kurdî
SOZDER’ê ragihand ku ev çalakî ne tenê di çarçoveya Cejna Zimanê Kurdî de ne, lê ew ê her dem û di her şertî de ji bo parastin û geşkirina zimanê kurdî xebatên xwe bidomînin. Guven got: “Em ê zimanê kurdî bigihînin nava hemû beşên civakê, ji ber ku ziman nasnameya me ye û parastina wê erka me hemûyan e.”
Çalakiyên ku ji aliyê endamên SOZDER’ê ve bi coşeke mezin di nav gel de tên meşandin û banga wan a ji bo xwedîderketina li zimanê kurdî, bi awayekî berfireh deng vedide. Ev çalakî, ku armanca wan bilindkirina hişyariya li ser girîngiya zimanê kurdî û teşwîqkirina bikaranîna wê ye, ji aliyê kesên ku ji zimanê kurdî hez dikin ve bi awayekî erênî tê pêşwazîkirin û piştgirî didin van hewldanên wan.
SOZDER'ê li kuçe û bazaran belavokên bi kurdî belav kirin.
**
Nûçeyên Eleqedar:
- 'Di hestkirina nasnameyê de rolê fenomentiyê'
- Li Amed û Stenbolê gelek çalakî ji bo Cejna Zimanê Kurdî têne lidarxistin
- Li Amedê ji bo ziman meşeke girseyî
- Hevseroka SZK'ê Viyan Hesen qala rewşa zimanê kurdî ya li Rojava kir
- Li Amûdê ji bo Cejna Ziman pêşangeha wêneyan
- Li Rojava Cejna Zimanê Kurdî çawa hat pîrozkirin? (Va ne agahiyên ji gelek bajaran)
- Beytên helbestvanên kurd li erdê neqişandin lê nîqaş jî çêbûn
- Ji bo ziman li sedan cihan bi sedan çalakî hene
- Fotoyê rojê ji bo Cejna Ziman tê
- PEN'a Kurd konferansek li dar dixe
- Bang ji bo Pêkanîna Bendên Manîfestoya Gîronayê
- Babat: Em xizmetek ji bo ziman dikin
- 'Sosyo-Polîtîkaya Ziman' wê bê nîqaşkirin
- 'Kurdan bi hev re televîzyon temaşe dikirin, lê telefonê ferdîbûnek bi xwe re anî'
- 'Weşangeriya kurdî bi rojnameya Kurdistanê dest pê kir'
- 'Sempozyûma Zimanê Kurdî' dest pê kir
- Babat: Em xizmetek ji bo ziman dikin
- 'Sosyo-Polîtîkaya Ziman' wê bê nîqaşkirin