Diyarname
Heta niha li ser hunermend Şivan Perwer gelek tişt hatin nivîsin. Perwer niha dîsa bû mijara pirtûkekê. Pirtûka bi navê “Şivan Perwer – Efsaneya Zindî” ku ji aliyê nivîskar Abdullah Încekan ve hatiye amadekirin ji Weşanên Nûbiharê derket.

Nivîskar Abdullah Încekan piştî xebata du salan “Şivan Perwer – Efsaneya Zindî” amade kir û pirtûk hat weşandin. Di pirtûkê de jiyana hunermend Perwer hatine pêşkêşkirin.. Di dema amadekirinê de A. İncekan qîma xwe bi arşîvan neaniye û di sohbetên mehane de bi vî îkonê kurd re ketiyê dû jiyana wî, bi wî re tevlî hin rêwîtî û konseran bûye, da ku ji destê yekem bibe agahdar.

Serokkomarê Avusturyayê Dr. Heinz Fischer, serokê herêma Kurdistanê Mesûd Barzanî, ji malbata wî Gulistan û Serxwebûn Perwer, hevkarên wî yên demên cihê-cihê Dilşad Saîd, Hakan Akay, Erol Mutlu û Willi Resetarits, hevalên wî Ali Gedik, Amed Mardin, Gulten Kaya di kitêba bi kurdî de bi anekdot, bîranîn, fikr û ramanên xwe li ser Şivan Perwer û hunera wî disekinin.
Di kitêba 312 rûpelî de çîroka hin stranên ku hunermend nivîsiye, paşsahneya hin berhemên wî, dîskografiya xebatên wî û agahiyên di heqê albuma nû Şivanname I – Gazind, ku demekê şûn da dertê, cî digrin. Kitêb bi du albûmên resiman, ku her yek jê ji 24 rûpelan pêk tê, jî balê dikşîne. Lipeyketina serpêhatiya vê jiyana bahozî bi fotoyên ji 1969’î heta 2012’yan tameke din dide.

Şivan Perwer – Efsaneya Zindî / Abdullah İncekan / 312 rûpel / Lêkolîn