Diyarname

Parlemena Herêma Xweser a Katalonyayê îro li hev civiya û bi dengdana erê ya 70 mebûsan serxwebûna xwe ragihand.

1'ê vê mehê li Katalonyayê referandûma serxwebûnê hatibû lidar xistin û dengê erê derketibû. Piştê yekê gelek nîqaş çêbûbûn. Hikumeta navendî ya Spanyayê rêveberiya Katalonyayê tehdîd kiribû. 

Meclisa Katalonyayê îro li hev civiya û biryara serxwebûnê ragihand. Ji bo ku serxwebûn bê erêkirin pêdivî bi dengê 68 mebûsan hebû, bi temamî 70 mebûsên katalan dengê erê dan, 10 jê dij derketin û dengê du kesan jî hat betalkirin. 

Li kuçeyên Barselonayê bi hezaran kes daketin kuçeyan û sidrûda katalan xwendin. Mebûsên katalan piştî dengdanê hev hembêz kirin û hev pîroz kirin.

Niha dor li cem hikumeta navendî ye. Hikumeta Madrîdê gotibû ku ew dê xweseriya Katalonya li gor xala 155'an a Spanyayê betal bikin û bi vî awayî Katalonya tehdîd kiribû. Niha dê hikumeta Spanyayê çi bibêje nediyar e.

Hin agahiyên li ser Katalonyayê
Katalonya li gor zagona bingehîn a Spanyayê herêmeke xweser e. Katalonya ji 4 bajaran pêk tê. Barselona, Girona, Lieida û Tarragona. Barselona bajarê herî mezin e û paytext e. Barselona bi klûba xwe ya fûtbolê jî navdar e. Zimanê fermî katalanî, spanyolî û zaravayek oksîtanî ne. Li gor serjimariya 2014'an hejmara kesên li Katalonyayê dijîn 7 mîlyon û 512 hezar û 982 kes e. Serokê Rêveberiya Xweser a Katalonyayê Carles Puigdemont e. Di parlemena wan de 135 mebûs hene.